Yevropa Ittifoqi kriptovalyutalar ustidan nazoratni kengaytirishni rejalashtirmoqda

Yevropa qimmatli qog‘ozlar va bozorlar agentligi (ESMA) o‘z vakolatlarini kengaytirishga va butun Yevropa Ittifoqi hududida kriptovalyuta birjalari operatorlari va boshqa bizneslarni to‘g‘ridan-to‘g‘ri nazorat qilishni boshlashga tayyorlanmoqda.

Ushbu qaror hozirda litsenziyalash va nazorat Yevropa Ittifoqiga a’zo mamlakatlarning milliy regulyatorlari tomonidan amaldagi "Kripto-aktivlar bozorlari" (MiCA) reglamenti qoidalariga muvofiq amalga oshirilayotgani sababli yuzaga kelgan nazoratning tarqoqligini bartaraf etish zarurati bilan bog‘liq.

ESMA rahbari Verena Ross Financial Times nashriga bergan intervyusida Yevropa Komissiyasi turli moliya sohalarida, jumladan, kriptoaktivlar sohasida nazorat funksiyalarini milliy organlardan ESMAga o‘tkazish bo‘yicha takliflar ishlab chiqayotganini tasdiqladi. Uning so‘zlariga ko‘ra, markazlashtirilgan boshqaruv Yevropa Ittifoqida yanada integratsiyalashgan, raqobatbardosh va samarali moliyaviy tizimni yaratishga yordam beradi.

Amaldagi MiCA rejimi kriptoaktivlar bilan xizmat ko‘rsatuvchi provayderlarni litsenziyalashning yagona qoidalarini nazarda tutadi, biroq nazorat va litsenziyalarni berish milliy organlarga ishonib topshirilgan, bu esa standartlarni qo‘llashda turli xilliklarga va yuzaga kelishi mumkin bo‘lgan huquqiy ziddiyatlarga olib keladi.

Malta va Litva kabi kichikroq davlatlar OKX, Crypto.com, Robinhood Europe kabi yirik kriptobirjalarga allaqachon litsenziya bergan bo‘lsa-da, yirik iqtisodiyotlar ko‘pincha tashvish bildirmoqda va ba’zan Yevropa Ittifoqining boshqa mamlakatlarida litsenziyalangan operatorlar faoliyatini cheklamoqda.

ESMAning to‘g‘ridan-to‘g‘ri nazoratiga o‘tish ushbu muammolarni bartaraf etishga va xavfsizlik, pul yuvishga qarshi kurashish va investorlar huquqlarini himoya qilishning yagona standartlarini o‘rnatishga qaratilgan. Bu, shuningdek, Yevropaning yagona kapital bozori faoliyatini soddalashtiradi.

Avvalroq, Rossiya Markaziy banki banklarga kapital bo‘yicha qat’iy talablar va zaxira me’yorlarini belgilagan holda kriptovalyutalar bilan ishlashga ruxsat berishni rejalashtirayotgani haqida yozgan edik.