Qonun qabul qilindi: Apple Rossiyada iPhone va iPad’ga RuStore o‘rnatishga ruxsat berishi kerak

Vladimir Putin bugun Apple’ga Rossiyada sotiladigan iPhone va iPad’larga Rossiyaning RuStore ilovalar do‘konini o‘rnatishga ruxsat berish majburiyatini yuklaydigan qonunni imzoladi. Qonun 2025-yil 1-sentyabrdan kuchga kiradi, u Apple’ga o‘z smartfonlari va planshetlarida Rossiya ishlab chiquvchilari va RuStore ilovalar do‘konining ilovalaridan foydalanish imkonini bermaydigan shartlarni belgilashni taqiqlaydi. Xuddi shu narsa Android boshqaruvidagi barcha smartfon ishlab chiqaruvchilariga ham tegishli.

Hujjat Apple va Google kompaniyalarining mahalliy xizmatlarga, jumladan, bank ilovalariga kirishni cheklovchi raqobatga qarshi amaliyotlariga chek qo‘yishga qaratilgan. Qonun, shuningdek, muqobil dasturiy ta’minotdan foydalanganda qurilmalarning funksionalligini blokirovka qilishni, ishlab chiquvchilarga narx siyosatini majburlashni va ilovalarda to‘lov usullarini cheklashni taqiqlaydi.

Eslatib o‘tamiz, tegishli qonun 24 iyun kuni Davlat dumasi tomonidan birdaniga ikki o‘qishda qabul qilingan edi. Qonun talablarini bajarmaslik tovarning kamchiligi hisoblanadi: bunday holatda fuqaro sotib olingan qurilmani almashtirish, ta’mirlash yoki pulini qaytarishni talab qilishi mumkin.