Apple’ning bozor qiymati birinchi marta 4 trillion dollardan oshdi

Apple aksiyalari rekord darajaga yetib, kompaniyaning bozor kapitallashuvini 4 trillion dollarga yaqinlashtirdi. iPhone Air’ning yupqaroq modelini o‘z ichiga olgan yangi iPhone seriyasining ishga tushirilishi aksiyalar o‘sishining asosiy omili bo‘ldi. Shu bilan birga, kompaniya mahsulot narxiga ta’sir qilishi mumkin bo‘lgan AQShdagi savdo tariflariga qaramay, narxlarni avvalgi darajada saqlab qoldi. Aksiyalarning o‘sishi 4,2 foizni tashkil etdi va har bir aksiya uchun 262,9 dollarga yetdi, bu esa Apple’ni Nvidia’dan keyin dunyodagi ikkinchi eng qimmat kompaniyaga aylantirdi.

Yil boshida Apple aksiyalari qiymatiga Xitoy bozoridagi kuchli raqobat va AQShning Osiyo ishlab chiqaruvchilariga, jumladan, iPhone ishlab chiqarishga ixtisoslashgan Xitoy va Hindistonga nisbatan tarif siyosati bo‘yicha noaniqlik bilan bog‘liq xavotirlar ta’sir ko‘rsatdi. Biroq, avgust oyi boshidan beri kompaniya aksiyalari Apple’ning AQSH iqtisodiyotiga qo‘shimcha 100 milliard dollar sarmoya kiritish haqidagi bayonoti fonida barqaror o‘sishni ko‘rsatmoqda, bu esa tariflar ta’sirini kamaytirishga yordam berishi mumkin.

Evercore ISI brokerlik kompaniyasi tahlilchilarining ta’kidlashicha, Xitoyda iPhone 17 uchun onlayn buyurtmalar joriy chorak natijalariga ijobiy ta’sir ko‘rsatadi. Ularning so‘zlariga ko‘ra, ma’lumotlar Xitoyda boshlang‘ich talab boshqa mintaqalarga qaraganda yuqori ekanligini ko‘rsatmoqda.

Apple choraklik hisobotini 30-oktyabr kuni taqdim etadi, moliyaviy ko‘rsatkichlar bozor prognozlaridan yuqori bo‘lishi kutilmoqda.