Kvantli internet oddiy internet bilan birlashtirildi - AQShda ilg‘or router yaratildi

Pensilvaniya shtati universitetining amerikalik olimlari bir vaqtning o‘zida klassik va kvant ma’lumotlarini bir xil magistral optik tolali liniyalar orqali uzatish imkonini beruvchi marshrutizatorni yaratdilar. Ushbu qurilma to‘liq avtomatik ravishda ishlaydi va odatiy internet protokollaridan foydalanadi.

Yaratilgan integral sxema bir vaqtning o‘zida ham oddiy trafikni, ham kvant signallarini qayta ishlash va ularni mavjud magistral tarmoqlar orqali uzatish imkoniyatiga ega. Ilgari fiziklar buni amalga oshirish mumkinligiga shubha qilishgan.

Yangi marshrutizatorning xususiyati kvant ma’lumotlarini marshrutlash usuli bo‘ldi. Har bir kvant signali oldidan o‘ziga xos "sarlavha" vazifasini bajaruvchi klassik IP-paket keladi. Bu esa, kvant zarrachalarining holatini buzmagan holda, kvant ma’lumotlarini adresatga to‘g‘ri yetkazish va bir vaqtning o‘zida oddiy internet uchun ham o‘sha liniyalardan foydalanish imkonini beradi.

Tizim sinovlari ikki abonentga ulangan bir kilometr uzunlikdagi universitet optik tolali tarmog‘ining ikkita tugunida o‘tkazildi. Natijalar shuni ko‘rsatdiki, kvant ma’lumotlari 97 foiz holatda to‘g‘ri yetkazilgan, oddiy internet esa uzilishlarsiz ishlashda davom etgan. Olimlarning ta’kidlashicha, bunday texnologiya yangi magistral liniyalarni yotqizmasdan, mavjud infratuzilma ustida kvant internetini yaratish imkonini beradi.