Durov: Fransiyada har qanday texnologik kompaniya "jinoiy guruh" deb e’lon qilinishi mumkin

Telegram asoschilaridan biri Pavel Durovning aytishicha, Fransiyada har qanday texnologik kompaniya jinoyatchi deb topilishi mumkin. Uning so‘zlariga ko‘ra, mahalliy byurokratlarning xatti-harakatlari sohaga investitsiyalarni jalb qilish sa’y-harakatlariga putur yetkazmoqda.

Ayni paytda Fransiyadagi har qanday texnologik kompaniya "jinoiy guruh" deb e’lon qilinishi mumkin. Texnologiya sohasiga sarmoya jalb qilish bo‘yicha o‘n yillik sa’y-harakatlar fransuz xalqi hisobiga o‘z martabalari va siyosiy maqsadlarini ilgari surayotgan bir nechta byurokratlar tufayli barbod bo‘lmoqda.

Pavel Durov

Avvalroq Fransiya rasmiylari Ilon Maskka tegishli X platformasi bo‘yicha tergov boshlagan edi. Bunga algoritmlarni manipulyatsiya qilish va ma’lumotlarni noqonuniy yig‘ish ayblovlari sabab bo‘lgan. X kompaniyasi bu da’volarni asossiz deb atadi.

Avvalroq Pavel Durov Telegramning Rossiyadan chiqib ketishi haqidagi mish-mishlarni rad etgandi. U messenjerga qarshi obro‘sizlantirish dasturi olib borilayotganini taxmin qildi. O‘tgan yilning avgust oyida Pavel Durov Fransiyada hibsga olindi va u yerda bir necha oy turdi.